Лицейде 10чу класста окуган кезим болчу. Анда дагы келечекте ким болоорумду ойлонуп жүргөм. Анимация тармагына жетүү кыйындай көрүнгөн. Ошол учурда бир күнү ЭлТР каналында ак-кууга айланган канбийке жөнүндө мультфильмди кыргыз тилинде көрүп калгам. Бир кыска эле үзүндүсү болгон, бирок ошол учурдан улам чет элдик тасмаларды кыргыз тилине которуу менин ойлорумдан такыр кетпей койду. Ошентип, өзүмдүн кыялымдагы өнөрүмдү таптым десем болот.

Жаш кезимден бери кинодон көрө көбүрөөк мультфильмдерге кызыгып жүргөм. Негедир колго тартылган анимациялык тасмалар мага өзгөчө көрүнгөн жана ошол эле кинодон айырмаланып өтө экспрессивдүү болгонун жактыргам, мисалы ошол эле Спанчбобду алсак. Ошондо мультик жасаганды үйрөнөм деген кыялымдан үн жаздыруу жөнүндө билдим. Бара-бара, аудиону жасоо мага андан да кызыктуу болуп кеткен.